የዳመናው አገር Ethiopian Semay 10/30/2026

 

የዳመናው አገር  Ethiopian Semay 10/30/2026

(ገጣሚው ጌታቸው ረዳ) 1985 ዓ.ም. (ኢትዮጵያ አቆጣጠር) ወቅቱ ትኩስ ዘረኛነት በሁሉም ነገዶች ተሰራጭቶ ሁሉም ልቡ አበጦ ሰክሮ በነበረበት አስቸጋሪ ሰዓት ዘረኞችን ስታገል ሲደርስብኝ የነበረው ስድብ፤ መገለል እና ዛቻ አማራውም ትግሬውም ኦሮሞውም ሁሉም ግራ እና ቀኝ ሲያዋክቡኝ በነበረበት ወቅት ወያነ በገባ ሁለተኛ አመቱ የጻፈኩት የጭንቅ ግጥም ነበር፦ እነሆ፦

 የዳመናው አገር

አንተም ታገስ አንተም ተው ባልኩኝ ቁጥር፤

ይጠሩኛል በነሱ ጎን ለምስክር።

ለሓቅ ስናገር አያምራቸው፤

ይመድቡኛል “ሸዋዊያን-ተጋሩ” (የሸዋ ትግሬዎች) ከሚሉዋቸው፤

ሌላኛውም ካልሄድኩ በመንገዱ፤

ያወርድብኛል የስድብ ንዳዱ።

” የወያኔ የሻዕቢያ” ዘር ይለኛል፤

መድረኩ ሁሉ ይዘጋብኛል፤

የቋንቋ ፍራቻም አገር አጥቅቶታል፤

ትግሬና አማራው ሌላውም ሌላውም

በሩቅ ይተያያል መዞር አልተቻለም፤መንደር በዘር ታጥሯል።

ንቡም ቢሆን ጨንቆት እምባ ቋጥሯል ዓይኑ፤

አይዞህ እንዳልለው ዓይኔ ብሷል ካይኑ።

በዚህ ናፈቅኩኝ፤አገር እንዳለው ሰው አገሬን ናፈቅኩኝ፤

ቀና ስል ወደላይ የጭጋግ ጉም ታየኝ፤

ልቤ አስሬ መታ ማመንም አቃተኝ፤

አየሁኝ ዳመና የጥንት የሚመስል፤

ይዞ ያገር ካርታ አብሮ የሰው ስዕል፤

ባተኮርኩኝ ቁጥር ይጠጋኛል፤

ደብዘዝ ይልና አንዳንዴም ይጎላል፤

ልዝነብ! ልዝነብ! ይላል፤

ዘንቦ ላይዘንብ ጠብ! ጠብ! ጠብ!... ጠብ! ይላል፤

ቀዝቃዛም አይደለም ቆዳ ያቃጥላል።

ቆዳየን ለማየት ዞር ብል ላንዳፍታ፤

ተሰወረ ጉሙ ካይኔ በእፍታ።

አሻቅቤ ሰማዩን ብቃኝ በአንክሮ

ሳይታወቀኝ አየሁት መሬት ወርዶ እፊቴ ላይ ተገትሮ፤

የሰው እግር በእግረሙቅ ተሸንክሮ።

ብጎነታትለው ልፈታው እግረሙቁን ልሰብረው

ጮኹብኝ በገደል ማሚቶ ፤ ከበቡኝ በግራ ቀኝ መጥተው

አትንካው አሉኝ እኔም መነካካት አልተው።

ነፃ አውጡት ፍቱለት ወይ ልፍታው ብየ በጠየቅኩኝ

ትግሬ ነህ አማራ? አሉኝ

ማንን እምስላለሁ? አልኩኝ።

አይመስልም እንዴ ቆዳየ ቆዳችሁ?

ለምን እንዲህ ጠየቃችሁ?

ብየ ጥያቄያቸውን በጥያቄ መለስኩኝ

ማመን ሲያቅተኝ የምለውን ሲጨንቀኝ፤

ገርገጭ ሲል እግረሙቁ ተሰማኝ

በግራ ጎተቱት፤በቀኝ አዋከቡት፤አጋር የለው አማኝ።

አለቀሰ! አብሮት ያለው ካርታም ተላቀሰ

አለቀሰ! አለቀሰ! አለቀሰና እኔኑም ጭምር አስለቀሰ።

ተሰናበተኝ እንደታሰረ” በጉም” ወጣ ታጅቦ ወደ ሰማይ

አብሮት ጭልጥ አለ ካርታውም አይታይ።

በዝግታ ይጓዛል፤

አንዴ ወደፊት አንዴ ወደኃላ ይዋልላል ።

ኮበለለ ኦሮማይ! ሄዷል ስል እንደገና ተሰበሰበ

ይዘንብ እና አብሮት ይወርድ ይሆን ስለው አልዘነበ።

” በጉም” ይጎተታል አየሁት ደብዛውን “እንዴ ይከስላል” “አንዴ ይጎላል” ወይ “አይሟሟ ወይ አይረጋ” ፤ ጎልቶ ላይጎላ ባየር፤

ይዋልላል በጉም የደመናው አገር።///-///

-ተፈጸመ- ጌታቸው ረዳ 1985 ዓ.ም. (ኢትዮጵያ አቆጣጠር)