ቆቤን ለልደቱ አያሌው ከጌታቸው ረዳ Ethiopian Semay 1/15/25

 

ቆቤን ለልደቱ አያሌው

ከጌታቸው ረዳ

Ethiopian Semay

1/15/25

ልደቱ አያሌው <<ለፓልቶክ ወጣት አርበኞች>> የማይችሉት ዱብ ዕዳ ፈተና ይዞላቸው መጥቷል።

 ከላይ ፎቶ ልደቱ ሲሆን ከጎን ያለው ፎቶ ደግሞ ከኤርትራ የመጡ ወደ ፖሊስ ሥራ አብይ አሕመድ የቀጠራቸው የኦነግ ተዋጊዎች በዓድዋ ሰሎዳ ተራራ ላይ ጣሊያንን ድል አድርጋ የተውለበለበቺውን ሰንደቃላማችን የአዲስ አባባን ኗሪዎች ለበዓል ሲወጡ የለበሱትን የኢትዮጵያ ሰንደቅዓላማ ሕብር ያለበትን ልብስና ፎጣ የአብይ አሕመድ ፖሊስ እየነጠቃቸው የሚያሳይ አፓርታይዳዊ ሥርዓት ማሳያ ነው።

ልደቱ ለሕክምና ወደ አሜሪካ እንደመጣና እዚህ ሕክምና እያለ አፓርታይዱ የአብይ አሕመድ ወረበላው ቡድን ፤ ልደቱን በሽብርተኛነት ከስሶ ለስቅላት እንደሚፈልገው ሁላችሁም የምታውቁት ዜና ነው። ልደቱ ግን ሕክምናው በከፊል አገባድዶ በ 1 ወር ውስጥ ወደ አገር እንደሚመለስ በለጠፈው ሰነድ ነግሮናል።

 አሁን ልደቱን ያለማድነቅ አይቻልም።

 እኔ ልደቱን በሚያስወቅሱት ላይ ስተቸው እንደነበር ተከታታዮቼ ታውቃላችሁ። ቤተመንግሥታችንን አሞኝቶ የተቆጣጠረው አፓርታይዱ “የነጮች ቅጥረኛ” የአብይ አሕመድ የኦሮሙማው ቡድን ካሁን በፊት ልደቱን በሐሰት ወንጅሎ እንዳሰረው ሁሉ ዛሬም ልደቱ ወደ አገር ሲመለስ ያንን የውሸት ውንጀላው በመድገም “እንግልት፤እስራት፤ግርፋት ወይንም ሞት” እየጠበቀው ያለመሆኑን በእርግጠኝነት መናገር በማይቻልበት ሁኔታ ልደቱ ይህንን “አፓርታይድ ሥርዓት” በሰላማዊ ትግል ለመታገል ሕክምናው ጨርሶ በጀግንነት ጨክኖ ወደ አገር ቤት እንደሚመለስ ራሱ ባስታወቀው ዜና ስሰማ የፖለቲካ አካሄዳችን ምንም ቢለያይም የናንተው ስሜት ባላውቅም “ፍርሃትን ደርምሶ” መውጣቱ <<ያጠለቅኩትን ቆቤ በክብር ለልደቱ አንስቻለሁ>>።

እንዲህ ያለ ፍርሐትን የሚጋፈጥ ጀግና ማየት ፈተናው እዚህ ላለው ዲያስፖራ ውስጥ ኑሮው መስርቶ የጀርመን፤ የአሜሪካ፤ የእንግሊዝ የካናዳ ወዘተ…. ሳንድዊች እየገመጠ ኮካኮላ እየተጎነጨ በትንሽዋ የአይፎንና የአንድሮይድ የስልክ መስተዋት እራሱን በማየት 16 ሰዓት ተቀምጦ ሱሪው እያረጠበ (ሴቶቹም ወንዶቹም) መድፍና መትረየስ ሳይተኩሱ በቀረርቶ እየፎከሩ የአገርቤቱን ትግል ካልመራሁት የሚል “ራስን የማቆነጃጀት ውሸት” የሚዋሹ አደገኛ ወጣቶች <<የማለፊያ ፈተናቸው>> ከልደቱ አያሌው ተሰጥቷቸዋል። ፈተናውን ያልፌታል ወይ?  

ልደቱ ተከተሉኝ የሚል መልዕክት በጽሑፉ ባያስተላልፍም ፤ በወሰደው ድፍረት በኔ አተረጓጎም ጥሪው በጣም ግልጽ ነው።  እዚህ ፓልቶክ ውስጥ በiPhone መስተዋት ፊታችሁን እያሳያችሁ እንደ ቡና አጣጪ የሃሜት ባልቴቶች እርስበርስ ስትዘላለፉ ከምትውሉ ፤ በድፍረት ጠላት አለን የምትሉት ጠላት ካላችሁ ጠላታችሁን ለመጋፈጥ “ተከተሉኝ” የሚል ነው የልደቱ ድፈረት። ይህንን ያለማድነቅ ግብዝነት ነው።

የኔ ምክር አጭር ነው። ልደቱን ካልተከተልክም ሳንዲውቹንና የስታርባክስ ቡና ሱስህን አቁመህ እንደ ወንዶቹና እንደ ፋኒቶቹ ወደ ጫካ ግባ የሚል ነው”። የልደቱ ድፍረት በጥሶ ወደ ጅቦች በረት መግባት የሚነግረን መልዕክት ይህ ነው። ፓልቶኮች ሆይ! ይሰማችሗል?!!!    

ልደቱ በዚያው የልብ ቀዶ ጥገናው በሽታው ሳያጋግም ወደ ጅቦች መንደር ዘሎ መግባትና ጅቦችን መጋፈጥ ያክል ጀግንነት ካላወደስን ምን እናወድስ? ጀግንነት ማለት ላመነበት ራስን መስዋዕት የማድረግ የሚያሳይ ተግባር ነው። የጀግንነት ተግባር እቤት ተቀምጦ በፓልቶክ እንደሚጮክ አይደለም። ጀግንነት ከተጠበቀው በላይ መሄድን በተለይም ፍርሃትን ወይም ችግርን የሚያካትት ድፍረት ነው። ልደቱ ይህንን እጅግ አስገራሚ ውሳኔ መወሰኑ እዚህ  ፈረንጅ አገር ውስጥ በምቾት እየኖሩ ፓልቶክ ላይ ተወዝፈው ያልሆኑትን ለመሆን የሚለፈልፉ ትግልን እንደ መዝናኛ የሚያይዩት “ወጣት ሴቶችም ወንዶችም” ከፍተኛ <<የማጣሪያ ፈተና>> ነው። <<የፓልቶክ ክፍለጦር አዛዦች>> ይህንን ጥሪ እና ፈተና ያልፉታል? ነው ዋናው የኔ ጥያቄ።

  ለረዢም ሰዓቶች በፓልቶክና በዩቱብ በየቤታችሁና በየምትሰሩበት በደባሪው የሰክዩሪቲ ጋርድ ሥራ ሰዓት መግደያ እንዲሆናችሁ “በተሌፎን መስተዋት” እራሳችሁን እያያችሁ ድንቁርናችሁን በማስተዋወቅ እርስበርሳችሁ አየር ባየር በዘለፋና በውሸት “አገር ውስጥ ላለው ሕዝብ ለማትሆኑበት መስዋዕትነት” ለመጀገነን የምትሞክሩ ወጣቶች ሆይ፤ ከልደቱ በዕድሜ ያነሳችሁ እና የልደቱ ዕድሜ እኩያ የሆናችሁ ሁሉ እንደ ልደቱ  ደፍራችሁ ወደ አገር በመግባት  የፓልቶክ ንግግራችሁን በተግባር አሳዩን። ይህንን ፈተና መሻገር አለባችሁ!

 በተለይ አምሐራ ተወላጅ ወጣቶች የምትከናነቡበት የውሸት ካባ መልበስ ትችሉ እንደሆን እንጂ ስለ አምሐራ ሕዝብ ዲያስፖራ ውስጥ ሳንድዊች እየገመጣችሁ ኮካ ኮላ እየጎነጫችሁ ስለ ፋኖ መሪዎች እገሌ እንደዚህ ይሁን እገሊት እንደዚህ ትሁን ብሎ የማዘዝ መብትም ሆነ ሞራል የላችሁም። እንግዲህ ፈተናው ወዳናንተ መጥቷል።

የሰው ገላ በነደደበት እናንተ ፓልቶክ ሆናችሁ በሰው የገላ እሳት የመሞቃችሁ አባዜ ይብቃ አቁሙ።"ቆንጆ ውሸት" በሚስብ ወይም በሚያጽናና መልኩ የሚቀርብ ውሸት እናንተን እንጂ ለተጎጂው ሕዝብ አይጠቅመውም። ወጣቶች ናችሁ ራስን ከሚያቆነጃጅ የውሸት ባሕል ውጡ።  

ሁለመናችሁ ሳጠናው <<አሚግዳላችሁ የጠለፋችሁ ይመስለኛል>> “አሚግዳላ” በሰው አንጎል ውስጥ የምትገኝ ትንሽየ ፍሬ መሳይ ዕጢ ናት። ዕጢዋ የማሰብ ማዕከል የሚጣራባት ክፍል ነች። ስሜቶችና ቁጣዎች ዋና ማቀነባበሪያ ማዕከል ትቆጣጠራለች። አሚግደላዋ በሆነ ምክንያት ስትበላሽ “የአሚግደላ ጠለፋ” ወይንም <<amygdala hijack>> ይሉታል ሃኪሞቹ። ይህ ሲሆን ልክ እንደ እናንተው የፓልቶክ ወጣቶች “ሰውየው ከቁጥጥር ውጭ የሆነ ድንገተኛ ቁጣና ፍሬ የሌለው የማይጨበጥ የስሜት ንግግር ውስጥ በመግባት ቁጣ ልቅሶ እና “በጨበርበር/ጩኸት” ተውጦ ጨዋነቱን ይስታል” ማለት ነው።

የናንተው አሚግዳላም የተጠለፈ ይመስለኛል። ከዚህ ሁሉ ዕብደታችሁ ነጻ ለመውጣት የልደቱን ድፈረት ታጥቃችሁ ስትፈልጉ በጫካ ስትሹ በከተማ ትግል ታግላችሁ አገራችሁን  ነፃ አውጡ!  

እኔ ግን ከልደቱ ጋር ያለኝ የፖለቲካ ልዩነት እንዳለ ሆኖ ስለድፍረቱና ቀና አስተሳሰቡ “ቆቤን በክብር አንስቼ አክብሮቴን እገልጻለሁ”

የኮካ ኮላው ትውልድ ፓልቶክ ውስጥ ተጥዶ ራሱን በውሸት ከማቆነጃጀት ባሕል ወጥቶ ወደ አገር ገብቶ ጀግንነቱን እንዲያሳየን ፈተናውን እንዲያልፉት ከልደቱ አያሌው ተሰጥቷቸዋል። መልካም የማለፊያ ፈተና እንዲሆንላችሁ እመኛለሁ! ካልሆነ ጀግኖቹ እየሞቱ አገር ነፃ ከወጡ በኋላ ለጉብኝትና ለመዝናናት ወደ አገር መሻገር በሰው ደም መዝናናት የነውር ነውር ነው!

ሰላሙን ለናንተ ይሁን

ጌታቸው ረዳ

አላልቅ ያለው አሳዛኙ የአምሐራ ሕዝብ መከራ! ጌታቸው ረዳ (Ethiopian Semay)1/12/25

አላልቅ ያለው አሳዛኙ የአምሐራ ሕዝብ መከራ!

ጌታቸው ረዳ (Ethiopian Semay)1/12/25

ፋታ በማይሰጥ በግል ምክንያት ለጥቂት ጊዜ ከብዕሬ ርቄ ስለነበር ተከታታዮቼን ይቅርታ እያልኩ ፤ ቢዘገይም ያላባራው የሃገራችን መከራ ባያስደስትም በህይወት ለመቆየታችን እንኳን ለልደቱ አደረሳችሁ እንዴት ሰነበታችሁ!

36 አመት ሙሉ በአፓርታይድ ዘረኛ <<የአገር በቀል>> ገዢዎች ከጣሊያኖች ከፋፍለህ ግዛ <<በከፋ መልኩ>> ኢትዮጵያዊያን ተጨፍጭፈናል፤ ተዋርደናል፤ ባሕራችን ተነጥቀናል፤ እርስ በርስ እንዳንዋደድ ድምበር ተበጅቶብን እየተላለቅን ተገዝተናል።

አሁን ደግሞ በከፋ መልኩ “የኦሮሙማው ቡድን” የሃገሪቱን መስርያ ቤቶች ልክ እንደ ወያኔው ከቀበሌው እስከ ጽዳት ሰራተኛው ከአውሮፕላን ጣቢያው እና የፓስፖርት እደሳ - “ደህንነትና የኢሚግረሺን’’ ጽ/ቤት ሠራተኞችና የሃገሪቱ ዋና ከተማ ከንቲባ ፤ ብዙዎቹ ከሃገሪቱ ወታደራዊ የበላይ አዛዦች እስከ ጠ/ሚኒሰትር ሃላፊዎችና እስከ አድራጊ ፈጠሪው “ናርሲስቱ” አብይ አሕመድ ድረስ ያለው የሥልጣን አምባገነንነት ፍትሕን በማፈን ከጀነሳይድ የዘር ማጥፋት ጀምሮ ብዙ ወንጀሎችን በመስራት የሕዝቡን ባህል አኮላሽቶ ማንነቱን አሳስቶ የሕዝባችን ህይወት ከድጡ ወደ ማጡ አስገብቷል።

ይህንን ከባድ ቀምበር ከሕዝቡ ጯንቃ ለማውረድ ቢሞከርም አንዳንድ ልበ ሙሉ ደፋሮች መስዋዕት የከፈሉ ሰዎች ቢኖሩበትም ለ36 አመት የረባ ተቃዋሚ አላገኘንም። የፋኖ ትግል ከመጀመሩ በፊት በ27 አመቱ ትግል ውስጥ ብዙ መጥፎ ክስተቶች ታይተውበታል። የኢትዮጵያ ተቃዋሚዎች የነበሩት በብዙዎቹ ፓርቲዎች በከፍተኛ የፓርቲ አመራሮች መካከል በተፈጠረ የስልጣን ግጭት ምክንያት ተከፋፍለው እርስበርስ ሳይስማሙ ቀርተው ባሳዛኝ ሁኔታ 27 አመት ሙሉ ኳስዋ በትግሬዎቹ ሥርዓት ቁጥጥር ዘመነች።  በዚህ ምክንያት የሥልጣኑ ሽሚያና አለመስማማታቸውም “የተቃዋሚዎች መለያ” ሆኖ ዘለቀና ያ መለያቸው ዛሬ ወደ ፋኖ ታጋዮችና ደጋፊዎቻቸው ተላልፎ ቀጠለ።በሚያሳዝን ክስተት የሕዝቡን ዕምባ ሊታበስ ቀርቶ ባንዳንድ የፋኖ አደረጃጀቶችና መሪዎች የአጉራዘለላዊ ባሕሪ ምክንያት ልክ ወያኔዎች ጫካ ወስጥ በነበሩበት ወቅት ሲያደርጉት እንደነበረው “አረጋዊያንን በእምብርክክ ማስኬድ፤ ሰውን መጥለፍና መረሸን” የዘወትር ክስተት ሆኖ ለሚዲያ ቀረበ።

የሚያሳዝነው ነገር ተስፋ የተጣለበት ትግል የሚመሩት “ዲያስፖራ” ውስጥ የሚኖሩ ሕሊናቸው የተቃወሰ አደገኛ ቡና አጣጪ ሐሜተኞች ጫካ ውስጥ በሚገኙ አንዳንድ የፋኖ መሪዎች ግፋ በለው ባይነት ሌሎችን የፋኖ መሪዎች ስብዕና እንዲያጠለሹ “የግፋ በለው ፈቃድ” ማበረታታቸውን ስናይ የአምሐራ ሕዝብ ሰቆቃ ገና እንደሚቀጥል የሚነግረን ምልክት ነው።

በሚገርም ሁኔታ እነዚህ አንዳንድ የፋኖ መሪዎች ነን የሚሉ (በግልጽ ለመጥቀስ የዘመነ ካሴ ፋኖ ቡድን) እራሳቸውን እንደ እውነተኛ ነፃ አውጪ ፤ አምባገነንነትና ኢፍትሐዊነትን እንቃወማለን ይሉና በዲሞክራሲ አሰራርና በሕግ እንደሚገዙ ዲሞክራቶች አድርገው ይቆጥሩና ነገር ግን ከሁሉም በላይ የተመሰከረውና ያየነው ግን እነዚህ ተቃዋሚዎች ዝቅተኛዋን ዲሞክራሲ እንኳ በራሳቸው መተግበር አልቻሉም። ጋዜጠኛን ያፍናሉ ፤ ከኔ በቀር ሌላ በአካባቢየ የታጠቀ ቡድን ላይ አልፈልግም፤ በማለት ይዝታሉ፤ ያፍናሉም ይረሽናሉም። እነዚህ አመራሮች ለአምባገነናዊ አገዛዝ ቅርብ ናቸው ብቻ ሳይሆን ሙሉ በሙሉ አምባገነኖች ሆነዋል። በዚህ ምክንያት የፋኖዎቹ ትግል ሥርዓቱን መገርሰስ ቀርቶ የአማራን ሕዝብ እንደ አሸን ማሰለፍ አልቻሉም። ስለዚህም ትግሉ በፍጥነት የታለመውን ግብ ሊመታ አልቻለም ። ስብዕናቸው እንግዳ እና ለዲሞክራሲ ያልተዘጋጀ ፤ ትዕግስት አልባ የሆነ ፤ በፖለቲካዊ አካላቸው በዲሲፕሊን ያልተገራ ሁሉም በኔው “ደም ሥር ይለፍ” የሚለው ጠባብነትና ልምድ አልባ ወጣትነታቸው ሲፈተሽ የከፋ እንደሆነ መገመት ችያለሁ።

ትግሉ የሚመሩት  ብዙዎቹ ወጣቶች እንደመሆናቸው ብዙዎቹ በዘመነ ወያኔ የተወለዱና ያደጉ ወጣቶች ስለሆኑ ፋኖን ሲያደራጁ አብሮ ያደጉበትን ዘረኛ አስተሳሰብ ከውስጣቸው ሲታገላቸውና ሲያንጸባርቁት ይታያል። ይህ እያንበብናቸውና እያደመጥነው ያለው አውራጃዊነት አልፎም ጎጠኛነታቸው ስንመለከት የተነሱበት ዓላማ አበላሽቶታል። በዲያስፖራውም ተስፋፍቶ እንደ ወረርሺኝ ሰደድ ተቀጣጥሎ የትግሉ ፈር አቅጣጫ ስቶ ለአፓርታይዱ ኦሮሙማው ቡድን ፋሲካ ሆኖለት ሲስቅባቸው ይደመጣል።

እንደ ዘመናዊነትና ዕውቀት አይተውት ‘ኢትዮጵያና አምሐራ” ሁለት ተቃራኒዎች አድርገው በመሳል “ኢትዮጵያኒሰቶች” የአምሐራ ጠላቶች ናቸው” እያሉ በግሃድ የሚሰብኩ አምሐራዎች በብዝዛት እየተራቡ ናቸው። ለዚህ አደገኛ ጸረ ኢትዮጵያ ቅስቀሳ የሚያካሂደው ደግሞ በሽተኛው  በ Intermittent explosive disorder የሚሰቃየው “የመረጃ ቲቪ” ዘመድኩን በቀለ የተባለው ሲሆን ፡ ያንን መርዝ ተቀብለው የሚያስረተጋቡ ብዙ አምሓራዎች አሉ።

እነዚህ አምሐራዎች ነን የሚሉ ዋጋ ላለመስጠት ሆኖም በስም መጥቀስ ይቻላል። በዲያስፖራ ፓልቶክ እውቅና ያላው አንድ ሰው ፤ የጎጃሙን ዘመነ ካሴ ምክትል የሆነው አስረስ ማረን << የባርያ ልጅ ነው>> ይለዋል። አንደኛው ደግሞ አብቶብስ ውስጥ ተሳፍሬ ትግሬ አለ ከተባ ትግሬ የሚል ስም ስሰማ አብሮ ላለመቀመጥ ካብቶቡሱ ዘልየ በፍጥነት እወጣለሁ፤ አማራ የተባለ ሁለ ትግሬ በተሳፈረበት አብቶቡስ አትሳፈሩ አስወግዷቸው የሚለው ልጅ የአብይ አገልጋይ የነበረ ፤ በጸረ ትግሬነቱ የምናውቀው <<ሃይለየሱስ>> የሚባል የኮምፓስ ዩ ቱብ ባለቤት የኤርሚያስ ለገሰ የቅርብ ወዳጅና “ሃያሲ” ነው። 

በዛ አላበቃም። ሰፊዋን  ሃገር ሠርተው አቁመው ያስረከቡን የዘውድ ሥርዓትና ነገሥታቶቻችንን  ኩፉኛ ይዘልፋቸዋል። እሱ ብቻ አይደለም፤ ብዙ አምሐራ ወጣቶች በነገሥታትና በበርያ ጫዋ ፖለቲካ ገብተው <<አምሐራ እና ኢትዮጲያኒስቶች>> የመይገናኙ ጠላቶች እያሉ የሻዕቢያ የወያኔና የኦነግ ጸረ ኢትዮጵያነት ፖለቲካ የሚሰብኩ በየፓልቶኩ እያደመጥናቸው ነው (አምሐራዎች መሆናቸውም አረጋግጫለሁ)። የአምሐራ ሕዝብ እና ኢትዮጵያዊነት አቀንቃኝ ወይንም <<ኢትዮፒያኒሰት>> ሁለቱ የማይገናኙ ጠላቶች ናቸው የሚለው አደገኛ መርዝ ፤ ካሁኑ ካልቆመ አምሐራ ወጣቶች ልክ እንደ ኤርትራ ወጣቶች ልክ እንደ ትግሬ እና ኦሮሞ ወጣቶች ኢትዮጵያን ወደ መጥላትና መካድ መንገድ ያመራሉ። የአምሐራ ትግልም ያኮላሸዋል። የመከራው ዶፍ ሕዝቡ አይችለውም። ስለዚህም መቆም እንዳለበት እመክራሉ።

እስከዘው ለፋኖ መሪዎችና ለትግሉ መጠናከር ዋናው መፍትሄው፤ ካሁን በፊት የተነገረው የስድብ እና የሥም ማጥለሸት ቅብብሎሽ ጨክኖ በመርሳት ስለ ሕዝቡ ስትሉ ካሁኑኑ መነጋገር ካልጀመራችሁ አብይ አሕመድና ኦሮሙማው ጋንግ ልክ እንደ ወያኔ 27 አመት ሊገዛን ነውና ቂምን ጥላችሁ ስለ ሕዝቡ እና ስለ መሰዋዕቱ ‘የአሳምነው ጽጌ’ ደም ብላችሁ በስልክ ተጠራርታችሁ አንድ ሆናችሁ ወደ ዋናው መንገድ ግቡ።

መልካም ሳምንት

ጌታቸው ረዳ